Գերասիմ Վարդանյանի կալանքի միջնորդությունը կքննի թմբկահար Դավիթ Արղամանյանը

Փաստաբան Բենիկ Գալստյանն իր ֆեյսբուքյան էջում գրել է, որ Գերասիմ Վարդանյանի կալանավորման միջնորդության քննարկումը տեղի կունենա այսօր՝ ժամը 20։00-ին:

Նշենք, որ Գերասիմ Վարդանյանի նկատմամբ հարուցվել է քրեական գործ նոյեմբերի 9-ի դեպքերով: Քնննիչներն այս նույն գործով արդեն ներկայացրել են չորս միջնորդություն, որոնցից մեկը կալանքի միջնորդություն, սակայն այն մերժվել է: Հերթական կալանքի միջնորդությունը ինչպես հայտնում է փաստաբանը, քննելու է դատավոր Դավիթ Արղամանյանը։ Նա, ինչպես արդեն մամուլը բազմիցս գրել է՝ ակտիվորեն մասնակցել է 2018 թվականի իշխանափոխությանը, ավելին՝  «դըմփ-դըմփ-հու» անող թմբկահար է եղել:

Իշխանափոխությունից մեկ տարի հետո կարիերայի սրընթաց աճ ունեցավ և դարձավ ՀՀ տարածքային կառավարման և ենթակառուցվածքների նախարարի օգնական, իսկ դրանից երկու տարի անց էլ` դատավոր։ Վերջին շրջանում քաղաքական հնչեղություն ունեցող բոլոր գործերը մակագրվում են հենց Դավիթ Արղամանյանին: Թե ինչ որոշում կկայացնի կոնկրետ այս գործով, որում քննիչները համառորեն կալանքի միջնորդություններ են ներկայացնում, կարելի է կռահել:

Աղբյուրը՝ Yerevan.today