Մոսկվայում ադրբեջանցիները «Բաքվի բակ» ռեստորանում հայ են սպանել, երկուսին էլ վիրավորել

Մոսկվայի արևելքում ծեծկռտուքի հետևանքով մեկ հայ է սպանվել, երկուսը՝ վիրավորվել։ Տուժածները, ըստ նախնական տեղեկությունների, հայ երկվորյակ եղբայրներ են. գրում է Antituran թելեգրամյան ալիքը։

«Կիրակի գիշերը Ռուսակովսկայա փողոցում ժամը 3.30-ի սահմաններում  «Բաքվի բակ»  ռեստորանի մոտ բախում է սկսվել քաղաքացիների միջև, որը վերաճել է դանակահարության։

Արդյունքում՝ ծանր վիրավորվել են երեք հայաստանցիներ, որոնցից երկուսը երկվորյակ եղբայրներ են՝ 30 տարեկան։ Նրանցից մեկը մահացել է հաջորդ օրը հիվանդանոցում, երկրորդը հոսպիտալացվել է ստամոքսի վնասվածքով։ Երրորդ տուժածը նույնպես բնիկ հայաստանցի է, նա կրծքավանդակի վնասվածքով տեղափոխվել է հիվանդանոց։

Հանցագործություն կատարելու կասկածանքով հետախուզվում է մի տղամարդ՝ ենթադրաբար, 25-30 տարեկան ադրբեջանցի. պարզվում են կոնֆլիկտի դրդապատճառները»,- գրում է ալիքը։

Ըստ նախնական տվյալների՝ վիճաբանությունը ծագել է այն բանից հետո, երբ ռեստորանի հայ այցելուները նկատել են, որ իրենց տրամադրված հաշիվը չի համապատասխանում կատարված պատվերին։