ԵՄ-ն անհանգստացած է, որ Ուկրաինայում պատերազմը կտարածվի Մոլդովայի վրա

ԵՄ արտաքին գործերի և անվտանգության քաղաքականության հարցերով գերագույն հանձնակատար Ժոզեպ Բորելը մտահոգություն է հայտնել Ուկրաինայի դեմ Ռուսաստանի սկսած պատերազմի` Մոլդովայի վրա տարածման հնարավորության առնչությամբ։

Այս մասին Բորելն ասել է «The State of Union»-ի 12-րդ պանելային հանդիպման ժամանակ, որը կազմակերպվել է Եվրոպական համալսարանական ինստիտուտի կողմից առաջիկա «Մայիսի 9-ի Եվրոպայի օրվա» կապակցությամբ Ֆլորենցիայում։

Մեկնաբանելով Մոլդովայում տեղի ունեցած վերջին իրադարձությունները՝ Բորելն ասել է. «Մեզ շատ անհանգստացնում է այն, ինչ կատարվում է Մոլդովայում և Ռուսաստանի կողմից սկսված պատերազմի՝ այս երկրի տարածքում տարածվելու հավանականությունը»։

Հիշեցնենք, որ վերջին շրջանում լարված է իրավիճակը Մերձդնեստրում։ Արևմուտքը զգուշացնում է, որ ՌԴ-ն հնարավոր է նոր ճակատ բացի։