Առջևում թշնամին է՝ Շուշիում լքում ես բնագիծդ ու ճողոպրում, առջևում հայն է՝ դու անչափ վստահ ես ուժերիդ վրա․ Մարտունու ոստիկանապետի «մերկությունը»

Վերջին օրերին Հանրապետության ողջ տարածքում տեղի են ունենում բողոքի զանգվածային գործողություններ։ Դրանցից մեկի ընթացքում Գեղարքունիքի մարզի բնակիչները մի քանի օր առաջ պարալիզացրել էին Մարտունի-Գավառ ավտոճանապարհը՝ իրենց բողոքն արտահայտելով իշխանությունների նկատմամբ ու պահանջելով Կառավարության հրաժարականը։ Ինչպես գիտենք, ողջ այդ իրադարձություններն իրականացվում են ոստիկանական և ուժային այլ կառույցների անմիջական վերահսկողությամբ, որոնց ժամանակ վերջիններս աչքի են ընկնում նաև ոչ իրավաչափ գործողությունների դիմելով։ 

Alternativ.am-ի հավաստի աղբյուրները մեզ են փոխանցում տարատեսակ տեղեկություններ, որոնք վերաբերվում են Նիկոլ Փաշինյանի իշխանությունը պահպանող իրավապահ անձերի կենսագրություններին։

Ինչպես մեզ է հայտնում աղբյուրը, Մարտունի-Գավառ ճանապարհին առանձնակի ուշադրություն գրաված ոստիկանության գնդապետը Մարտունի քաղաքի  ոստիկանապետ Ստեփան Գալստյանն է, ով 44-օրյա պատերազմի ժամանակ իրեն վերապահված ջոկատի կազմով մեկնել է Շուշիի ինքնապաշտպանական բնագիծ։ Ոստիկաններից բաղկացած հենց այդ ջոկատին վստահված բնագծից տեղի է ունեցել ճեղքում, քանի որ Ստեփան Գալստյանն ու մյուսները ճողոպրել են մարտադաշտից և իրականացրել դասալքություն։

Alternativ.am-ի տեղեկություններով, Ստեփան Գալստյանը դասալքության համար բերման է ենթարկվել Արցախի Ռազմական Ոստիկանության աշխատակիցների կողմից ու տվել բացատրություն, իսկ հետո, անհասկանալի հանգամանքներում, ազատ է արձակվել, իսկ իր վրա հարուցված քրեական գործը՝ «ջրվել է»։  

Զարմանալու ոչինչ, իրականում չկա, քանի որ Փաշինյանը որքան հեշտությամբ կարող է մեկին շնորհել Ազգային հերոսի կոչում, իսկ հետո՝ «բաքսի գողանալու» համար հեռացնել նրան նախարարի պաշտոնից, այնքան էլ՝ կարող է դասալիքին պահել ոստիկանապետի պաշտոնում։ 

Աղբյուրը՝ alternativ.am