Աթենքը բողոք է հայտնել Թուրքիային՝ կապված թուրքական կործանիչների կողմից Հունաստանի օդային տարածքի խախտումների հետ

Հունաստանը բողոք է հայտնել Աթենքում Թուրքիայի դեսպանին՝ կապված թուրքական կործանիչների կողմից Հունաստանի օդային տարածքի կրկնակի խախտումների հետ, որոնք թռել են նաեւ բնակելի թաղամասերի վրայով։

Բողոքը Թուրքիայի դեսպանին է ներկայացրել արտաքին գործերի գլխավոր քարտուղար Թեմիստոկլիս Դեմիրիսը՝ ԱԳ նախարար Նիկոս Դենդիասի հանձնարարությամբ, ասվում է նախարարության հաղորդագրության մեջ։

«Այդ գործողությունները Հունաստանի ինքնիշխանության խախտում են ու անընդունելի սադրանք եւ հակասում են միջազգային իրավունքի հիմնարար սկզբունքներին»,- ասել է Դեմիրիսը։ Նրա խոսքով, բացի անօրինական եւ սադրիչ լինելուց, դրանք վտանգում են միջազգային օդային հաղորդակցությունը, լիովին հակասում են Հունաստանի եւ Թուրքիայի միջեւ բարիդրացիական հարաբերությունների սկզբունքներին եւ խաթարում վստահության մթնոլորտ ստեղծելու ջանքերը»։

Թուրքական F-16 ինքնաթիռները ժամը 10:18-ից մինչեւ 12:24-ը առնվազն չորս անգամ թռել են Էգեյան ծովի արեւելյան կղզիների վրայով: