Իրաքը դատապարտել է թուրքական ռազմական գործողությունը Հյուսիսային Իրաքում

Հյուսիսային Իրաքում Թուրքիայի սկսած ռազմական գործողությունը խախտում է արաբական հանրապետության ինքնիշխանությունը և «բարիդրացիության սկզբունքը»։ Այս մասին ապրիլի 18-ին հայտնել է Alsumaria հեռուստաալիքը՝ հղում անելով Իրաքի ԱԳՆ պաշտոնական ներկայացուցիչ Ահմեդ աս Սահաֆին։

«Իրաքի կառավարությունը կտրականապես մերժում և խստորեն դատապարտում է թուրքական զորքերի կողմից Հյուսիսային Իրաքի Մաթինա, Ալ Զաբ, Ավաշին և Բասյան շրջաններում ATAK ուղղաթիռների և անօդաչու թռչող սարքերի միջոցով ռմբակոծություններ իրականացնելու ռազմական գործողությունները»,- ասել է նա:

Բաղդադի հայտարարության մեջ նաև ընդգծվում է, որ Անկարայի գործողությունները «միջազգային դաշնագրերին և օրենքներին հակասող գործողություն են»։ Թուրքիային կոչ է արվում Իրաքի տարածքը չվերածել «ցանկացած հարեւան երկրի վնաս պատճառելու համար» կամ «արտաքին ուժերի կողմից հակամարտությունների ու հաշիվներ մաքրելու պլացդարմի»:

Հիշեցնենք, որ ապրիլի 18-ի գիշերը Թուրքիան ռազմական գործողություն է սկսել Հյուսիսային Իրաքում, որի նպատակը Քուրդիստանի աշխատավորական կուսակցության (PKK) դեմ պայքարն է։