«Պատմեք մեր պատմությունը երգերի միջոցով». Զելենսկին դիմել է «Գրեմի»-ի մասնակիցներին

Երկուշաբթի` ապրիլի 4-ի լույս  գիշերը, Ուկրաինայի նախագահ Վլադիմիր Զելենսկին տեսաուղերձ է հղել «Գրեմի» երաժշտական մրցանակաբաշխության մասնակիցներին և հանդիսատեսին՝ կոչ անելով աջակցել Ուկրաինային Ռուսաստանի դեմ պատերազմում «ամեն կերպ». գրում է «Ուկրաինսկայա պրավդան»:

«Ո՞րն է երաժշտության հետ ամենաուժեղ հակադրությունը: Ավերված քաղաքների ու մահացած մարդկանց լռությունը. լրացրեք լռությունը ձեր երաժշտությամբ: Դա արեք այսօր՝ մեր պատմությունը պատմելու համար: Խնդրում ենք աջակցել մեզ՝ որքան կարող եք։ Ամեն կերպ, բայց ոչ՝ լռությամբ… Ուկրաինացի երաժիշտները սմոքինգի փոխարեն զրահաբաճկոն են կրում: Նրանք հիվանդանոցներում երգում են վիրավորների համար, նույնիսկ նրանց համար, ովքեր չեն կարողանում լսել նրանց։ Բայց երաժշտությունը դեռ կթափանցի ու կհնչի»,- ասել է Ուկրաինայի ղեկավարը:

Զելենսկիի ելույթը ցուցադրվել է բեմից կախված երկու հսկայական էկրաններին։

Կոչից հետո ամերիկացի երգիչ Ջոն Լեջենդը և ուկրաինացի բանաստեղծ Լյուբով Յակիմչուկը կատարել են Ուկրաինային նվիրված ստեղծագործություն։

«Գրեմի»-ն աշխարհի ամենահեղինակավոր մրցանակն է երաժշտության ասպարեզում: 2022 թվականին այն կշնորհվի 64-րդ անգամ։ Մրցանակաբաշխությունն ի սկզբանե նախատեսված էր անցկացնել հունվարի 31-ին, սակայն կորոնավիրուսի տարածման պատճառով  հետաձգվել էր։