Բաքուն Երևանին խորհուրդ է տվել «չմիջամտել իր ներքին գործերին»

Ադրբեջանի ԱԳՆ-ն հայտարարություն է տարածել, որում նշում է, որ «հերքում է Հայաստանի մեղադրանքները՝ կապված Ղարաբաղ գազամատակարարման հետ»:

Երկրի ԱԳՆ մամուլի ծառայության ղեկավար Լեյլա Աբդուլաեւան ասել է, թե իբր  «Հայաստանի ԱԳՆ-ն փորձում է միջամտել Ադրբեջանի ներքին գործերին՝ կապված մի քանի օր առաջ տեղի ունեցած միջոցառմանը միջազգային կազմակերպությունների մասնակցության հետ (օկուպացված Շուշի քաղաքում ՄԱԿ-ի ներկայացուցիչների մասնակցության), իսկ այժմ Հայաստանն արդեն նման փորձեր է անում մեկ այլ հարցում»։

«Հայաստանը տեւական ժամանակ է, ինչ ապակառուցողական մոտեցում է ցուցաբերում, անհիմն մեղադրանքներ հնչեցնում, ինչը բացահայտում է այս երկրի իրական մտադրությունները։ Խորհուրդ ենք տալիս Հայաստանին՝ ապահովել ստանձնած պարտավորությունների կատարումը, այդ թվում՝ իր զինված ուժերի մնացորդների դուրսբերումը տարածաշրջանից, և դրանով իսկ նպաստել տարածաշրջանի խաղաղությանն ու անվտանգությանը, չհնչեցնել անհիմն և անօրինական մեղադրանքներ»,- ասել է նա։