ՏԵՍԱՆՅՈՒԹ․ Օրվա իշխանության նախաձեռնած հայ֊թուրքական, այսպես կոչված՝ «հաշտեցման գործընթացը» պետք է կասեցվի. Իշխան Սաղաթելյան

Օրվա իշխանության նախաձեռնած հայ֊թուրքական, այսպես կոչված՝ «հաշտեցման գործընթացը» պետք է կասեցվի՝ ըստ Yerkir.am-ի ասաց ՀՅԴ Հայաստանի Գերագույն մարմնի ներկայացուցիչ Իշխան Սաղաթելյանը Հայ Յեղափոխական Դաշնակցության 34-րդ Ընդհանուր ժողովի բացման պաշտոնական արարողության ժամանակ։

Ներկայացնում ենք մի հատված ելույթից։

2020 թ. նոյեմբերի 9-ից հետո Հայաստանը հայտնվել է աշխարհաքաղաքական սպառնալից միջավայրում՝ ներքին դիմադրողականության անկումով, տարածքային կորուստներով, անգամ ինքնիշխանության կորստի վտանգով։ Իսկ այս ամենի մեղավոր և պատասխանատու իշխանությունը ոչ միայն պատրաստ չէ դիմագրավել այդ մարտահրավերները, այլ իր քայլերով սպասարկում է Ադրբեջանի և Թուրքիայի շահերը:

Օրվա իշխանությունն անտեսելով՝

- Թուրքիայի հայատյաց և Հայոց ցեղասպանության ժխտման քաղաքականությունը,  

- Քառասունչորսօրյա պատերազմին Թուրքիայի բացահայտ մասնակցության փաստը,

- Թուրք-ադրբեջանական տանդեմի՝ «Շուշիի հռչակագրով» ամրագրված հակահայկական ռազմավարական նպատակներն ու պանթուրանական ծրագրերը,

- քաղաքական եւ տնտեսական էքսպանսիա իրականացնելու միջոցով տարածաշրջանում լիարժեք վերահսկողություն հաստատելու Թուրքիայի նպատակները,

փորձում է տարածաշրջանում խաղաղության դարաշրջան բացելու կեղծ ու ցնորամիտ լոզունգների տակ երկիրը տանել նոր կորուստների և նոր զիջումների:  

Առ այդ, մեկ անգամ ևս զգուշացնում ենք.  

-Հայաստանի եւ հայության կողմից կենսական զիջումներ ենթադրող որեւէ գործընթացի վերջնարդյունքը հայոց պետականության փլուզումն է,  

-Հայաստանի ինքիշխանության,  տարածքային ամբողջականության եւ Արցախի լինելիության ու անվտանգության հարցերը փոխկապակցված են,

-Թուրքիան շարունակում է Հայաստանի հետ հարաբերությունների կարգավորումն օգտագործել իր եւ Ադրբեջանի պահանջները բավարարելու նպատակով։

 Հետևաբար, հայ֊թուրքական, այսպես կոչված, հաշտեցման գործընթացը պետք է կասեցվի։