Ադրբեջանն ու Վրաստանը քննարկել են էլեկտրահաղորդման ենթակառուցվածքների զարգացումը

Ադրբեջանն ու Վրաստանը քննարկել են երկու երկրների միջև առկա էլեկտրահաղորդման ենթակառուցվածքի հետագա զարգացումը։ Այս մասին երեքշաբթի հայտնել է Trend-ը՝ Վրաստանի էկոնոմիկայի և կայուն զարգացման նախարարության մամուլի ծառայությանը հղումով։

Հարցը քննարկվել է Վրաստանի էկոնոմիկայի և կայուն զարգացման փոխնախարար Ռոմեո Միկաուտաձեի և «Ազերէներջի» ԲԲԸ-ի ղեկավար Բալաբաբա Ռզաևի միջև։ Հանդիպմանը մասնակցել է նաև Ադրբեջանում Վրաստանի դեսպան Զուրաբ Պատարաձեն։

Կողմերը քննարկել են էներգետիկ ոլորտում երկու երկրների համագործակցության առաջնահերթ ուղղությունները։ Նշվել է երկու երկրների էներգետիկ համակարգերի միացման համար լրացուցիչ ենթակառուցվածքի ստեղծման կարևորությունը։

Հիշեցնենք, որ Վրաստանը կախում ունի էներգիայի ներմուծումներից. ամենից շատ էլեկտրաէներգիա է ներմուծվում Ռուսաստանից, որին հաջորդում են Թուրքիան և Ադրբեջանը: