Արցախից տեղահանված կամ անշարժ գույքը կորցրած քաղաքացիները ևս երկու ամիս դրամական աջակցություն կստանան

Կառավարության այսօրվա՝ հունվարի 27-ի նիստում ՀՀ աշխատանքի և սոցիալական հարցերի նախարար Նարեկ Մկրտչյանը ներկայացրեց նախագիծ, համաձայն որի` պատերազմի հետևանքով Արցախից տեղահանված կամ անշարժ գույքը կորցրած քաղաքացիները 2022թ. հունվար-փետրվար ամիսներին ևս կստանան դրամական աջակցություն:

«Հաշվի առնելով, որ միջոցառման շահառուներից շատերը դեռևս չեն լուծել բնակարանային խնդիրները, լուծված չեն նաև որոշների զբաղվածության խնդիրները, ու որոշները գտնվում են սոցիալապես ոչ բարենպաստ վիճակում, նաև՝ պայմանավորած  ձմեռակացի հնարավոր դժվարություններով` առաջարկում ենք աջակցության ժամկետները ևս երկու ամսով երկարաձգել»,– ասաց նա։

Այսպիսով` մինչև 18 տարեկան քաղաքացիները, 1-ին և 2-րդ կարգի հաշմանդամություն ունեցող անձինք ամսական կստանան 40 հազար դրամ, մյուս շահառուները` անկախ տարիքից և սեռից, 20 հազարական դրամ: