Տոկաևը սկսել է վաղաժամ չեղարկել արտակարգ դրությունը Ղազախստանի շրջաններում

Ղազախստանի նախագահ Կասըմ-Ժոմարտ Տոկաևը հրամանագիր է ստորագրել կայուն իրավիճակ ունեցող շրջաններում արտակարգ դրությունը վաղաժամկետ չեղարկելու մասին։ Այս մասին հայտնում է РИА Новости-ն։

«Համաձայն «Արտակարգ դրության մասին» Ղազախստանի Հանրապետության օրենքի 9-րդ հոդվածի՝ որոշում եմ կայացնում չեղարկել արտակարգ դրությունը Արևմտյան Ղազախստանի շրջանի սահմաններում»,- ասվում է հրամանագրի տեքստում։

Հունվարի 2-ին Ղազախստանում սկսվել էին զանգվածային ցույցեր․ քաղաքացիները դժգոհություն էին հայտնում հեղուկ գազի գների կրկնակի բարձրացման կապակցությամբ։ Հանրապետության ամենամեծ քաղաքում՝ Ալմա Աթայում, սկսվել էին անկարգություններ, թալան, հարձակումներ պետական կառույցների և անվտանգության ուժերի վրա։

Երկրի իշխանությունները երկրում արտակարգ դրություն սահմանեցին մինչև 2022 թվականի հունվարի 19-ը և սկսեցին հակաահաբեկչական գործողություն իրականացնել։ Հունվարի 11-ի դրությամբ Ղազախստանում արտակարգ դրությունը խախտելու համար պատասխանատվության է ենթարկվել ավելի քան երկու հազար մարդ։