ԵՄ-ն և Ուկրաինան կքննարկեն ռուսական ագրեսիան զսպելու ուղիները

ԵՄ արտաքին գործերի և անվտանգության քաղաքականության գերագույն ներկայացուցիչ Ժոզեպ Բորելը Ուկրաինայի արտգործնախարար Դմիտրի Կուլեբայի հետ կքննարկի Ռուսաստանի ագրեսիան զսպելու հարցերը։

Ուկրաինայի ԱԳՆ-ի տվյալներով՝ Բորելը հունվարի 4-6-ը Կուլեբայի հրավերով երրորդ անգամ կայցելի Ուկրաինա։

«Դմիտրի Կուլեբան և Ժոզեպ Բորելը բանակցություններ կվարեն, որոնց առանցքային թեմաներն են լինելու՝ Ռուսաստանի Դաշնության հետագա ագրեսիայի զսպումը, մասնավորապես՝ կոշտ տնտեսական պատժամիջոցների միջոցով, խաղաղ կարգավորման խթանումը՝ հիմնված անկախության, Ուկրաինայի ինքնիշխանության և տարածքային ամբողջականության հարգման վրա, Դոնբասում հումանիտար նախագծերի իրականացումը, մեր պետության հետագա ներքին վերափոխումներին աջակցությունը»,- նշել են գերատեսչությունում։

Ընդգծվում է, որ եվրոպական դիվանագիտության ղեկավարի այցը նպատակ ունի հաստատելու ԵՄ-ի աջակցությունը Ուկրաինային՝ Ռուսաստանի Դաշնության ագրեսիվ գործողությունների ֆոնին։

Չորեքշաբթի՝ հունվարի 5-ին, Կուլեբան և Բորելը կայցելեն Լուգանսկի շրջանի շփման գիծ, որտեղ կծանոթանան ռուս-ուկրաինական զինված հակամարտության գոտում անվտանգության ներկա իրավիճակին։

«Սա կլինի ԵՄ բարձր ներկայացուցչի առաջին այցը Դոնբաս՝ Ուկրաինայի դեմ ռուսական ագրեսիայի սկզբից ի վեր»,- ասվում է հաղորդագրության մեջ։