Կոսովոն Թուրքիայից աջակցություն է խնդրում ՆԱՏՕ-ին անդամակցելու հարցում

Անջատողական Կոսովոյի նախագահ Վյոսա Օսմանին Թուրքիայի պաշտպանության նախարար Հուլուսի Աքարից պահանջել է Անկարայի աջակցությունը ՆԱՏՕ-ին Կոսովոյի անդամակցության հարցում։ Այս մասին Օսմանին հայտարարել է դեկտեմբերի 28-ին Աքարի՝ Պրիշտինա այցի ժամանակ։

Օսմանիի կաբինետի ուղերձում ընդգծվում է, որ զրուցակիցները քննարկել են նաեւ ռազմական համագործակցության ընդլայնման եւ Թուրքիայից ռազմական տեխնիկա գնելու հնարավորությունները։

Բանակցությունների թեմաներից է եղել համագործակցությունը, այսպես կոչված, «Կոսովոյի անվտանգության ուժերի» սպայական պատրաստության ոլորտում։

Օսմանին թուրք նախարարին տեղեկացրել է նաև Բալկաններում տիրող քաղաքական իրավիճակի մասին՝ նշելով «տարածաշրջանն ապակայունացնելու նպատակով Սերբիայի մշտական սպառնալիքներն ու սադրանքները»։

Հիշեցնենք, որ Կոսովոն, որը, ՄԱԿ-ի Անվտանգության խորհրդի 1244 բանաձևի համաձայն, չունի սեփական զինված ուժեր ունենալու իրավունք, որոշում է կայացրել «Կոսովոյի անվտանգության ուժերը» վերածել լիարժեք բանակի։