Ադրբեջանցիները կանգնած են Սյունիքում. դա ի՞նչ փաստաթղթի հիման վրա է, որը մինչ այսօր թաքցվում է և փաստացի մեր մեջքի հետևում է ստորագրվել. Աննա Գրիգորյան

«Երբ ադրբեջանցիները կանգնած են Սյունիքում, դա ի՞նչ փաստաթղթի հիման վրա է, որը մինչ այսօր թաքցվում է և փաստացի մեր մեջքի հետևում է ստորագրվել»,– ասաց նա և հավելեց. «Պատերազմի ընթացքում Նիկոլ Փաշինյանը գնում է Սյունիք և համայնքապետերին ասում՝  կազմակերպել Սյունիքի ինքնապաշտպանությունը, դեկտեմբերի 17-ին հրաման է տալիս, որ  զորքերը հետ գան․ տարբեր հատվածներում մոտ 20 կմ առաջ են եղել ադրբեջանցիների այսօրվա տեղակայման վայրից»:

Աննա Գրիգորյանը ներկայացրեց  նաև, որ երբ համայնքնապետերն ասել են, որ պատրաստ են մինչև վերջ կանգնել, պաշտպանության նախկին նախարար Վաղարշակ Հարությունյանը ասել է․ «Դե գնացեք, մենք ձեզ հետ չենք, կարողանում եք պաշտպանել՝ պաշտպանեք, մենք ձեզ հետ չենք»։

Պատգամավորը հավելեց՝ ստորագրվել է փաստաթուղթ զորքերը հետ կանչելու վերաբերյալ․ կառավարության հետ հարցուպատասխանի ժամանակ Նիկոլ Փաշինյանը հայտարարել է, որ  զորքերի հետքաշման հրամանը ինքն է հնչեցրել։

«Իշխանությունները հերթական գաղտնի գործընթացներն են նախաձեռնում, այս դեպքում արդեն՝ Թուրքիայի հետ: Պետք է հասկանալ, որ այն, ինչ հնչեցվում է, միշտ չէ, որ իրականություն է»,- ասաց պատգամավորը։