Մոսկվայում կայացած «3+3» ձևաչափի հանդիպմանը ներկայացվել է Վրաստանի դրոշը, ինչը մեզ համար անընդունելի է. Վրաստանի ԱԳՆ

Դեկտեմբերի 10-ին Մոսկվայում կայացած «3+3» ձևաչափի հանդիպման ժամանակ ներկայացվել է Վրաստանի դրոշը, ինչը, իհարկե, մեզ համար անընդունելի է. Վրաստանի Հանրային հեռուստատեսության հաղորդմամբ՝ հայտարարել է Վրաստանի ԱԳՆ-ի կապի վարչությունը։

Գերատեսչությունը սրան արձագանքել է համապատասխան դիվանագիտական խողովակներով։

«Վրացական կողմը բազմիցս հայտարարել է իր հստակ դիրքորոշումը «3+3» տարածաշրջանային ձևաչափի վերաբերյալ, որ մենք չենք քննարկելու Վրաստանի մասնակցությունն այս ձևաչափին։ Դեկտեմբերի 10-ին Մոսկվայում կայացած հանդիպման ժամանակ ներկայացվել է Վրաստանի դրոշը, ինչն, իհարկե, մեզ համար անընդունելի է, ինչին մենք արձագանքել ենք համապատասխան դիվանագիտական խողովակներով»,- ասվում  է ԱԳՆ հաղորդագրության մեջ։

Դեկտեմբերի 10-ին Մոսկվայում կայացել է Հայաստանին պարտադրված, այսպես կոչված, «3+3» ձեւաչափի առաջին հանդիպումը` Էրդողանի և Ալիևի նախաձեռնությունը։ Հանդիպմանը մասնակցել են Թուրքիայի, Ռուսաստանի, Իրանի, Ադրբեջանի և Հայաստանի պատվիրակությունները՝ ԱԳ փոխնախարարների գլխավորությամբ։ Հանդիպումից մեկ օր առաջ Վրաստանի ԱԳՆ-ն հայտարարություն էր տարածել, որ Վրաստանը հանդիպմանը ներկայացված չի լինի։ Վրաստանն ավելի վաղ հայտնել էր, որ չի մասնակցի մի ձևաչափի, որում ներգրավված է նաև «օկուպանտ» Ռուսաստանը: