ԱՄՆ-ը գործողություններ կձեռնարկի Իրանի հետ միջուկային գործարքի ձախողման դեպքում

ԱՄՆ իշխանությունները նոր միջոցներ կձեռնարկեն՝ ուղղված Իրանի եկամտի աղբյուրները սահմանափակելուն, եթե մոտ ապագայում Թեհրանի միջուկային ծրագրի շուրջ դիվանագիտական հարաբերությունները ձախողվեն. ասել է Սպիտակ տան խոսնակ Ջեն Փսակին։

Ըստ նրա` ԱՄՆ նախագահ Ջո Բայդենը «համոզված է, որ Իրանը չպետք է միջուկային զենք ստանա»։ «Մենք կարծում ենք, որ դիվանագիտությունը միջուկային ճգնաժամից խուսափելու լավագույն միջոցն է։ Այնուամենայնիվ, Իրանի միջուկային ծրագրի ներկայիս առաջընթացի լույսի ներքո՝ նախագահը հանձնարարել է իր օգնականներին՝ նախապատրաստվել այն հավանականությանը, որ եթե դիվանագիտությունը ձախողվի, մենք ստիպված կլինենք անցնել այլ տարբերակների: Դա նախապատրաստություն է պահանջում»,- ասել է Փսակին:

Նա հավելել է, որ եթե դիվանագիտությունը ճիշտ ուղով չգնա, և եթե Իրանի միջուկային ծրագրի վրա աշխատանքը շարունակվի արագանալ, ԱՄՆ-ն այլ ելք չի ունենա, քան լրացուցիչ միջոցներ ձեռնարկելը Իրանի՝ եկամուտներ ստեղծող հատվածների վրա:

Փսակին մանրամասներ չի հայտնել, միայն ասել է, որ ԱՄՆ գանձապետարանի աշխատակիցները մտադիր են հաջորդ շաբաթ մեկնել ԱՄԷ՝ խորհրդակցություններ անցկացնելու իշխանությունների և բիզնեսի ներկայացուցիչների հետ։ Նրա խոսքով՝ նախատեսվում է քննարկել Իրանի հետ առևտրի հետ կապված հարցեր։