ԱՄՆ-ը հնարավոր է համարում Իրանի հետ միջուկային գործարքի ռազմավարության վերանայումը

Վաշինգտոնը գուցե ստիպված լինի վերանայել իր ռազմավարությունը, թե ինչպես լավագույնս հասնել Թեհրանի հետ նոր միջուկային գործարքի, եթե նախկինը «տեսանելի ապագայում» իրականություն չդառնա»․ հինգշաբթի ասել է ԱՄՆ պետդեպարտամենտի բարձրաստիճան պաշտոնյա՝ պատասխանելով «Ալ Արաբիայի» հարցին:

«Մենք դեռ քննարկում ենք բոլոր խնդիրները` պատժամիջոցների վերացման մասշտաբները, քայլերը, որոնք Իրանը կձեռնարկի`վերադառնալու համար իր միջուկային պարտավորություններին: Այս ամենը քննարկվում է, ուստի մենք որևէ հարցի վերաբերյալ նախնական համաձայնություն չունենք»,- ասել է նա:

ԶԼՄ-ներում ավելի վաղ հաղորդումներ էին հայտնվել, վկայակոչելով Իրանի աղբյուրներ, որ Միացյալ Նահանգները համաձայնել է չեղյալ համարել Իսլամական Հանրապետության նկատմամբ պատժամիջոցների մեծ մասը, որոնք սահմանվեցին այն բանից հետո, երբ 2018 թվականի մայիսին նախկին նախագահ Դոնալդ Թրամփը միակողմանիորեն խախտեց 2015 թվականի միջուկային գործարքը:

«Մենք տարաձայնություններ ունենք, և եթե տեսանելի ապագայում դրանք չկարողանանք լուծել, կարծում եմ, որ  պետք է վերախմբավորվենք և պարզենք, թե ինչպես ենք շարժվելու»,- ասել է պետդեպարտամենտի պաշտոնյան:

ԱՄՆ-ը և Իրանը մասնակցել են Վիեննայում անցկացված անուղղակի բանակցությունների վեց փուլի՝ Եվրոպայի, Չինաստանի և Ռուսաստանի միջնորդությամբ: