Իրանական Mahan Air ավիաընկերությունը կիբերհարձակման է ենթարկվել

Իրանի Mahan Air ազգային ավիաընկերությունը կիրակի առավոտյան կիբերհարձակման է ենթարկվել․ հայտնում է Fars-ը։

«Այսօր առավոտյան Mahan Airlines ազգային ընկերությունը ենթարկվել է կիբերհարձակման, որը հաջողությամբ հետ է մղվել ու չեզոքացվել», - ասվում է հաղորդագրությունում։

Իրանը հաճախակի է ենթարկվում կիբերհարձակումների։ Այսպես՝ հոկտեմբերի երկրորդ կեսին խախտվել էր իրանական բենզալցակայանների համակարգը, ինչը թույլ էր տալիս իրանցի վարորդներին բենզին գնել զեղչված գներով։ Ավելի ուշ իշխանությունները հայտարարեցին, որ համակարգը կիբերհարձակման է ենթարկվել ԱՄՆ-ի և Իսրայելի կողմից։ Հուլիսին անջատվել էին Իրանի տրանսպորտի նախարարության  համակարգերը։ Նաև պետական երկաթուղային ընկերության կառավարման համակարգերի վրա հարձակման հետևանքով նախկինում նկատվել էին գնացքների շարժի խափանումներ։ Իրանի ատոմային էներգիայի գործակալությունը հունիսի 20-ին հայտարարել էր Բուշերի ատոմակայանում տեխնիկական խափանումների մասին, ինչի հետեւանքով նրա աշխատանքը որոշ ժամանակով դադարեցվել էր։