Թուրքիան մտադիր է դառնալ աշխարհի առաջատար տերություններից մեկը. Էրդողան

Թուրքիայի իշխանություններն ամեն ջանք գործադրում են երկիրն աշխարհի առաջատար տերությունների շարքում ներառելու համար։ Այս մասին հայտարարել է Թուրքիայի նախագահ Ռեջեփ Թայիփ Էրդողանը Անկարայում hանրապետության հիմնադիր Մուստաֆա Քեմալ Աթաթուրքի հիշատակի արարողության ժամանակ. հայտնում է Anadolu-ն։

Ըստ նրա՝ դրան կհաջողվի հասնել երկրի զարգացած ենթակառուցվածքների, քաղաքական և տնտեսական հզորության շնորհիվ։

Էրդողանն ընդգծել է, որ Աթաթուրքի կողմից 1923 թվականին ժողովրդի կամքի գերակայության սկզբունքով հիմնադրված նոր պետությունը թուրք ժողովրդի պետականության երկու հազարամյա ավանդույթների շարունակությունն է։

«Անշուշտ, անհրաժեշտ և կարևոր է հարգել Աթաթուրքի հիշատակը։ Առավել կարևոր է շարունակել նրա գործը, հետևել հանրապետության հիմնադրի պատվիրաններին»,- ասաց նա՝ վստահեցնելով, որ Թուրքիայի ներկայիս իշխանությունները հետևում են առաջին նախագահի կտակած ուղեգծին։

Երկրի ղեկավարը հավելել է, որ Թուրքիան այսօր ներգրավված է Սիրիայում, Լիբիայում և Կովկասում տեղի ունեցող գործընթացներում, ինչպես նաև ժամանակակից Թուրքիան ակտիվ դիվանագիտական պայքար է տանում Եվրոպայում և աշխարհում։