Երբեք ներում չեմ շնորհի. Զուրաբիշվիլին իշխանություններին հորդորել է Սահակաշվիլիին համարել «հատուկ բանտարկյալ»

Վրաստանի նախագահ Սալոմե Զուրաբիշվիլին կրկնել է, որ հրաժարվում է կիրառել իր լիազորությունները և ներում շնորհել երկրի երրորդ նախագահ Միխեիլ Սահակաշվիլիին։

Միևնույն ժամանակ, ճեպազրույցում Զուրաբիշվիլին իշխանություններին խորհուրդ է տվել Սահակաշվիլիին ընկալել որպես «հատուկ բանտարկյալ» և միջոցներ ձեռնարկել, որպեսզի բանտում հացադուլի հայտարարած նախկին նախագահի առողջական վիճակի վատթարացումը չօգտագործվի «քաղաքական շահարկումների» համար:

«Քանի որ այս հարցը քննարկվում է, պետք է ասեմ, որ նախկին նախագահի ներման վերաբերյալ իմ դիրքորոշումը հաստատուն է և անփոփոխ. Ո՛չ և երբե՛ք։ Նախկին նախագահը չի համապատասխանում ո՛չ քաղբանտարկյալ, ո՛չ անարդարության զոհ լինելու չափանիշներից որևէ մեկին։ Նա ինքնակամ և անօրինական կերպով Վրաստան մուտք գործած դատապարտյալ է, որի ժամանումը  ապակայունացման նպատակ էր հետապնդում։

Չնայած դրան, ելնելով հասարակական և քաղաքական բարձր հետաքրքրությունից, նա պետք է համարվի հատուկ բանտարկյալ, և դա պահանջում է ՔԿՀ-ի վարչակազմի և իշխանությունների կողմից հատուկ ուշադրություն և բոլոր միջոցների ձեռնարկումը, որպեսզի նրա առողջության վատթարացումը չօգտագործվի քաղաքական շահարկումների կամ ապակայունացման համար:

Սա պահանջում է առավելագույն թափանցիկություն և ժամանակին արձագանքել նրա վիճակի վատթարացման ցանկացած նշանի: Այսքանը, ես այլևս չեմ վերադառնա այս հարցին»,- ասել է Սալոմե Զուրաբիշվիլին։