Իրանը կաջակցի դեպի Վրաստան տրանզիտային ճանապարհի կառուցմանը

Իրանը պատրաստ է մասնակցել Հայաստանի տարածքով դեպի Վրաստան տարանցիկ նոր ճանապարհի շինարարությանը: Այդ մասին շաբաթ օրը դարձյալ հայտարարել է Իրանի ճանապարհների և քաղաքաշինության փոխնախարար Խեյրուլլահ Խադեմին:

«Հայաստանը ծրագրում է Իրանից Վրաստան նոր տարանցիկ ուղի ստեղծել: Մենք հայտարարել ենք այս ճանապարհի շինարարությանը մասնակցելու՝ մեր պատրաստակամության մասին»,- նրա խոսքը մեջբերում է ILNA գործակալությունը:

Ըստ պաշտոնյայի՝ «խոսքը նոր միջանցքի մասին է, բացի այլընտրանքային Գորիս-Կապան մայրուղուց, որի շուրջ կողմերը համաձայնության են եկել»:

Նա նշել է, որ այսօր կա Իրանի Արևելյան Ադրբեջան նահանգը Երևանի հետ կապող երթուղի: «Այս ճանապարհի մոտ 21 կիլոմետրը, ըստ վերջին փոփոխությունների, համարվում է Ադրբեջանի մաս»,- հավելել է փոխնախարարը:

Նրա խոսքով, «ադրբեջանական կողմը վճարներ է գանձում այս կարճ հատվածն անցնելու համար, որտեղ կա միայն մեկ անցակետ»: «Անհրաժեշտ է հնարավորինս շուտ ստեղծել այլընտրանքային ճանապարհ, որպեսզի երթուղին այլևս չանցնի Ադրբեջանի տարածքով, ինչը նույնպես կարևոր է հայերի համար և բավարարում է նրանց կարիքները»,- ասել է Խադեմին: