Արևմուտքը կորցրել է իր հեգեմոնիան միջազգային ասպարեզում. Էրդողան

Արևմտյան գերակայության պնդումների վրա հիմնված աշխարհակարգի խնդրահարույց ընկալումը դառնում է անցյալ: Այս մասին Kriter ամսագրին տված հարցազրույցում ասել է Թուրքիայի նախագահ Ռեջեփ Թայիփ Էրդողանը:

Թուրք նախագահի խոսքով՝ աշխարհակարգի հիմքերը վերանայելու անհրաժեշտությունը ճանաչված և ընդունված է միջազգային գործընթացների բոլոր մասնակիցների կողմից, այդ թվում` Արևմուտքում: 

«Արևմուտքի հեգեմոնիան, որը տևել էր դարեր, ընկղմվել է մոռացության մեջ: Ձևավորվում է նոր միջազգային համակարգ: Թուրքիայի նման երկրների աճող ուժը նրանց դարձրել է միջազգային խաղացող: Խոսքը ոչ միայն մեր երկրի, այլև «միջին ուժի» շատ այլ պետությունների մասին է, որոնց քաշը գնալով աճում է: Մենք արդեն ապրում ենք բոլորովին այլ աշխարհում, որտեղ իշխում են ոչ միայն մեծ տերությունները»,- ասել է Էրդողանը:

Նա ուշադրություն է հրավիրել վերջին տասնամյակներում Թուրքիայի ձեռքբերումներին: «Ժամանակակից Թուրքիան ռազմական գործողություններ է իրականացնում սեփական ուժերի հաշվին: Մեր երկիրն ակտիվորեն զարգացնում է ռազմարդյունաբերական համալիրը: Այս ուղղությունը կշարունակվի: Թուրքիայի պաշտպանական արդյունաբերությունն, անկասկած, նոր բարձունքների կհասնի»,- ասել է Թուրքիայի ղեկավարը: