Հունաստանը գազի գնի կտրուկ տատանումների դեմ համաեվրոպական հեջավորման մեխանիզմ է առաջարկել

Հունաստանը գազի գնի կտրուկ տատանումների դեմ համաեվրոպական հեջավորման մեխանիզմ է առաջարկել: Գազի գներն այս տարի կտրուկ աճել են, քանի որ համաշխարհային տնտեսությունը վերականգնվում է կորոնավիրուսի համավարակից հետո, իսկ համաշխարհային պահանջարկը շատ ավելի արագ է աճում, քան առաջարկը, հաղորդում է Reuters-ը:

ԵՄ առաջնորդներն այս շաբաթ կքննարկեն, թե արդյոք գների բարձրացումը համակարգված պատասխան է պահանջում:

Եվրոգոտու ֆինանսների նախարարների ղեկավարին ուղղված համատեղ նամակում Հունաստանի ֆինանսների եւ էներգետիկայի նախարարներ Փաշալու Դոնոհոն Եվրահանձնաժողովին կոչ է արել դիտարկել համաեվրոպական հիմնադրամի ստեղծման հնարավորությունը` գազի գների տատանումների դեմ հեջավորման համար:

Այս մեխանիզմը կարող է միջոցներ գրավել ԵՄ երկրներին ածխածնի արտանետումների քվոտաների դիմաց հատկացվող գումարներից` ջերմության եւ էլեկտրաէներգիայի նրանց սպառման եւ մեկ շնչի հաշվով համախառն ներքին արդյունքի հիման վրա, համատեղ նամակում հայտարարել են Հունաստանի ֆինանսների նախարար Խրիստոս Ստայկուրասը եւ էներգետիկայի նախարար Կոստաս Ստրեկասը:

Հունաստանի առաջարկը ներառում է նաեւ ածխածնի արտանետումների կրացուցիչ վարկերի աճուրդ՝ ԵՄ արտանետումների առեւտրի համակարգի միջոցով, ինչը լրացուցիչ եկամուտներ կբերի ԵՄ երկրներին, որպեսզի օգնի նրանց ֆինանսավորել սպառողների փոխհատուցման սխեմաները՝ ձմեռային սեզոնին օգտագործելու համար:

«Գազի եւ, համապատասխանաբար, էլեկտրաէներգիայի գների աննախադեպ թռիչքը լուրջ խնդիր է ԵՄ անդամ բոլոր երկրների համար, որոնցով հնարավոր չէ զբաղվել միայն ազգային մակարդակով»,- ասվում է նամակում:

Հունաստանը հայտարարել է, որ առաջիկա ձմռանը եվրոպական սպառողներին սպասվում է լրացուցիչ 100 մլրդ եվրոյի էլեկտրաէներգիայի ծախս:

Ավելի ուշ հոկտեմբերին ԵՄ առաջնորդները կքննարկեն ԵՄ-ում գազի ռազմավարական պաշար ստեղծելու եւ գազի գներից էլեկտրաէներգիայի գները տարանջատելու հարցը, ասել է Եվրահանձնաժողովի ղեկավար Ուրսուլա ֆոն դեր Լյայենը: