Ավստրիան Թուրքիային մեղադրում է ԵՄ-ի վրա ճնշում գործադրելու համար միգրանտներին օգտագործելու մեջ

Ավստրիայի Եվրամիության հարցերով նախարար Կարոլին Էդտշտադլերը Թուրքիային մեղադրել է ԵՄ-ի վրա ճնշում գործադրելու համար միգրանտներին օգտագործելու մեջ: Այս մասին հայտնում է Associated Press-ը:

«Թուրքիան միգրացիան և միգրանտներն օգտագործում է որպես Եվրամիության վրա ճնշման լծակ, մենք դա չենք հանդուրժի: Ո'չ Թուրքիան, ո'չ Բելառուսը, 'ոչ էլ աշխարհի որևէ այլ երկիր չեն կարողանա շանտաժի ենթարկել մեզ՝ որպես Եվրամիության»,- ասել է Էդտշտադլերը:

Նրա խոսքով` ԵՄ երկրները, որոնք բախվում են անօրինական ներգաղթյալների հոսքի հետ, կարող են հույս դնել Եվրամիության իրենց գործընկերների աջակցության վրա:

Էդտշտադլերը նաև կոչ է արել ԵՄ-ին` համատեղ լուծել միգրանտների խնդիրը այն երկրներում, որտեղից մարդիկ հեռանում են, և այն երկրներում, որոնք հանդես են գալիս որպես տարանցման կետեր:

Նա նաև հիշեցրել է, որ Ավստրիան այլևս փախստականներ չի ընդունի, քանի որ 2015-ից ի վեր երկրում ավելի քան 120 հազար մարդ արդեն ապաստան է ստացել: