Facebook-ը գիտի, որ Instagram-ը կարող է վնասել դեռահասներին, բայց գաղտնի է պահում. The Wall Street Journal

Facebook ընկերությունը հետազոտություն է անցկացրել, որի համաձայն՝ Instagram սոցիալական ցանցը կարող է բացասաբար անդրադառնալ երիտասարդ օգտատերերի վրա, սակայն հետազոտության արդյունքները հրապարակայնորեն չի տարածել. գրում է The Wall Street Journal-ը:

Պարբերականի լրագրողների տրամադրության տակ եղած հետազոտական նյութերի համաձայն՝ Facebook-ն ուսումնասիրում է խնդիրը վերջին երեք տարիների ընթացքում: Ընկերության անցկացրած հարցումներին մասնակցել են տասնյակ հազարավոր օգտատերեր: Արդյունքում՝ ինքնասպանության մտքերից բողոքող դեռահասների շրջանում բրիտանացի օգտատերերի 13%-ը և ամերիկացի օգտատերերի 6%-ը ինքնասպանության ցանկությունը կապել են Instagram-ի ազդեցության հետ: Հավելվածը կարող է ազդել նաև ուտելու խանգարումների վրա:

Զեկույցում ասվում է, որ Instagram-ը «սրում է մարմնի իմիջի հետ կապված խնդիրները յուրաքանչյուր երրորդ դեռահաս աղջկա համար»: Մասնավորապես՝ աղջիկների 32%-ն ասել է, որ երբ անհանգստանում էին իրենց մարմնի համար, Instagram-ն իրենց ավելի շատ էր դրդում վատ զգալուն: Ամերիկացի դեռահասների 14%-ը բողոքում է սոցիալական լրատվամիջոցների պատճառով ինքնագնահատականի վատթարացումից:

Facebook-ի փորձագետները կարծում են, որ «բացասական սոցիալական համեմատության» ազդեցությունը Instagram-ի դեպքում ավելի ցայտուն է, քան TikTok- ի և Snapchat-ի, քանի որ այս սոցիալական ցանցն ավելի շատ կենտրոնացած է մարմնի և ապրելակերպի ցուցադրման վրա: Միևնույն ժամանակ, ուսումնասիրությունը նշում է, որ օգտատերերի մեծամասնությունը «կարող է հաղթահարել բացասական ազդեցությունները և գնահատել Instagram-ը որպես արտահայտվելու և հաղորդակցվելու միջոց»:

Ըստ WSJ-ի՝ այս ուսումնասիրությունների արդյունքները ներկայացվել են Facebook-ի բարձրագույն ղեկավարներին, այդ թվում՝ ընկերության հիմնադիր Մարկ Ցուկերբերգին:

Instagram-ի ադմինիստրացիան արդեն իր բլոգում տեղադրել է պատասխան WSJ-ին՝ պնդելով, որ ամսագրի հոդվածը «կենտրոնանում է սահմանափակ արդյունքների վրա և դրանք բացասական լույսի ներքո է ներկայացնում»: Ըստ զեկույցի՝ հետազոտության ընթացքում ձեռք բերված եզրակացությունները «չեն կարող համարվել վերջնական և ընդգրկուն»: