Ալիևը Ադրբեջանը բաժանել է տնտեսական շրջանների. ստեղծվել է «Արևելյան Զանգեզուր» շրջան, իսկ ո՞րն է «արևմտյանը»

Ադրբեջանի նախագահ Իլհամ Ալիևը հրամանագիր է ստորագրել երկիրը, այդ թվում`Արցախը, տնտեսական շրջանների բաժանելու մասին:

Ադրբեջանի նոր բաժանումը, ըստ «Ազերթաջ»-ի, կապված է «այդ տարածքների հավասար զարգացման ապահովման հետ` դրանց հարուստ տնտեսական ներուժի, բնական ռեսուրսների և զբոսաշրջության լայն հնարավորությունների արդյունավետ օգտագործմամբ»:

Ընդհանուր առմամբ, ստեղծվել է 14 շրջան:

Մասնավորապես, այսպես կոչված, «Ղարաբաղի տնտեսական շրջանը» ներառում է Ակնայի (Աղդամ), Շուշիի, Վարանդայի (Ֆիզուլի), Թերթերի, Մարտունու (Խոջավենդ), Իվանյանի (Խոջալու), Աղջաբեդի և Բարդայի շրջանները և նույնիսկ Ստեփանակերտ քաղաքը:

Այսպես կոչված՝ «Արևելյան Զանգեզուր» շրջանը ներառում է Ջրականը, Քարվաճառը (Շահումյանի շրջանի մի մասը), Քաշունիքի, Քաշաթաղի և Կովսականի շրջանները:

Ուշագրավ է հենց այս՝ «Արևելյան Զանգեզուր» կոչված շրջանի առկայության փաստը, քանի որ եթե կա արևելյանը, կան նաև հեռահար՝ «Արևմտյան Զանգեզուրի» նպատակներ, որն արդեն ընդգրկելու է ՀՀ Սյունիքի մարզի տարածքը։