Լոնդոնը խոստացել է, որ բրիտանական նավերը կշարունակեն անցնել Ղրիմի մոտով

Մեծ Բրիտանիայի արտաքին գործերի նախարար Դոմինիկ Ռաաբը հայտարարել է, որ թագավորության ռազմանավերը բոլոր իրավունքներն ունեն մուտք գործելու «Ուկրաինայի տարածքային ջրեր». հաղորդում է ՌԻԱ «Նովոստի»-ն:

Մեկնաբանելով հունիսի կեսին Ռուսաստանի պետական սահմանը խախտած Defender ռազմանավի հետ կապված իրավիճակը՝ նախարարը նշել է, որ նավը գնում էր ամենակարճ և ուղիղ երթուղով:

«Սա միջազգայնորեն ճանաչված շարժման ուղի է: Մենք բոլոր իրավունքներն ունենք ազատորեն անցնելու Ուկրաինայի տարածքային ջրերով` համաձայն միջազգային իրավունքի: Մենք կշարունակենք դա անել»,- ասել է Ռաաբը:

Նա նաև լիակատար աջակցություն է հայտնել ռազմանավի անձնակազմի գործողություններին:

Ռուսաստանի պաշտպանության նախարարությունը հունիսի 23-ին հայտարարել էր, որ բրիտանական Defender-ը հատել է երկրի պետական սահմանը Ղրիմի մերձակայքում և մտել է ռուսական ջրեր՝ երեք կիլոմետր խորությամբ: Արտասահմանյան նավը լքել է ռուսական տարածքը սահմանային պարեկային նավի նախազգուշական կրակից հետո, իսկ Սու-24Մ-ը «նախազգուշական ռմբակոծություն» է կատարել նավի ուղղությամբ։

BBC-ի լրագրողը, որը դեպքի պահին գտնվել է բրիտանական նավին, խոստովանել է, որ նավը դիտավորյալ է մտել Ռուսաստանի տարածքային ջրեր:

Դեպքից հետո Ռուսաստանի արտաքին գործերի նախարարությունը կանչել է Մոսկվայում Բրիտանիայի դեսպան Դեբորա Բրոներտին և խիստ բողոք հայտնել նրան: