Լիբանանի վարչապետը նշել է, որ երկիրը լուրջ աղետի եզրին է

Լիբանանի վարչապետ Հասան Դիաբը հայտարարել է, որ երկիրը մեծ աղետի եզրին է տնտեսական ճգնաժամի պատճառով:

Բեյրութում արտասահմանյան դիվանագիտական ներկայացուցչությունների ներկայացուցիչների հետ հանդիպման ժամանակ Դիաբը նշել է, որ Լիբանանը ներկայումս ապրում է երկրի պատմության մեջ աննախադեպ տնտեսական և ֆինանսական ճգնաժամ, որը շուտով կհանգեցնի մեծ աղետի:

«Մինչ մենք նստած ենք այստեղ, բենզալցակայանների առջև հերթեր են, մարդիկ դեղատներով շրջում են՝ դեղեր փնտրելու համար, և լիբանանցիները ստիպված են առանց լույսի նստել իրենց տներում»,- ասել է վարչապետը:

Նրա խոսքով՝ Լիբանանը մտել է մութ թունել, մարդկանց տառապանքներն իսկական ողբերգություն են դարձել: Վարչապետը շեշտել է, որ, ներկայիս իրավիճակի ֆոնին, երկիրը մեծ աղետի եզրին է:

«Դա արդեն ակնհայտ է՝ Լիբանանն ու լիբանանցիները աղետի եզրին են: Սակայն այս ողբերգության հետևանքները կզգացվեն ոչ միայն մեր երկրում, այլ նաև արտերկրում: Ոչ ոք չի կարող խուսափել Լիբանանի փլուզման հետևանքներից»,- ասել է Դիաբը: