Լիբանանի իշխանությունները նշել են Բեյրութի նավահանգստում բռնկված հրդեհի պատճառը

Բեյրութի նավահանգստում բռնկված հրդեհի պատճառ կարող էին լինել վերանորոգման աշխատանքները, որոնց ժամանակ «բոլգարկա» է օգտագործվել, հայտարարել է Լիբանանի աշխատանքի նախարարի պաշտոնակատար Միշել Նաջարը, հաղորդում է ՌԻԱ Նովոստին:

Նաջարը նշել է, որ հետաքննությունը կսկսվի հրշեջների աշխատանքների ավարտից անմիջապես հետո, հետաքննությունը պետք է պարզի այս միջադեպի բոլոր մանրամասները: Նրա խոսքով՝ հրդեհն այս պահին ամբողջովին վերահսկվում է:

Հինգշաբթի ցերեկը Բեյրութի նավահանգստի ազատ մաքսային գոտում վառելիքի եւ անվադողերի պահեստներում մեծ հրդեհ է բռնկվել: Հրդեհի օջախը մեկուսացնելու համար մի քանի ժամ է պահանջվել, եւ դրան մասնակցել են մարտական ուղղաթիռներ:

Նավահանգստի կողքով անցնող բոլոր ճանապարհները, ներառյալ Բեյրութից հյուսիս տանող գլխավոր մայրուղին, ոստիկանության կողմից արգելափակվել էին:

Հրդեհի հետեւանքով, ըստ Լիբանանի Կարմիր խաչի, զոհեր եւ վիրավորներ չկան։

Լիբանանի նախագահը միջադեպի կապակցությամբ անվտանգության գերագույն խորհրդի նիստ կանցկացնի: