Պուտինը նշել է, որ ո՛չ Հայաստանը, ո՛չ էլ Ադրբեջանը շահագրգռված չեն Արցախում ճգնաժամի զարգացմամբ

Ոչ ոք շահագրգռված չէ Լեռնային Ղարաբաղում ճգնաժամի զարգացմամբ, ո՛չ Հայաստանը, ո՛չ էլ Ադրբեջանը: Այս մասին ուղիղ գծի ժամանակ ասել է ՌԴ նախագահ Վլադիմիր Պուտինը:

«Ռուսաստանը որոշակի դեր է խաղացել այս լուրջ ճգնաժամի կարգավորման գործընթացում: Ոչ ոք շահագրգռված չէ դրա զարգացմամբ`ո՛չ Ադրբեջանը, ո՛չ Հայաստանը, ո՛չ էլ, առավել ևս, Լեռնային Ղարաբաղի բնակիչները»,- նշել է  Ռուսաստանի Դաշնության նախագահը:

Ըստ նրա՝ եթե բոլորը ներդաշնակ ապրեն, ապա հաջողություն կգրանցվի ոչ միայն անվտանգության հարցերում, այլև տնտեսության մեջ: Պուտինը շեշտել է, որ դա հասկանում են ինչպես Հայաստանի, այնպես էլ Ադրբեջանի ղեկավարները:

ՌԴ նախագահն ընդգծել է, որ երկու երկրների սահմանը սահմանազատելու հետ կապված դժվարություններ կան. ըստ էության, այն երբեք գոյություն չի ունեցել, դա միայն վարչական սահման էր միութենական հանրապետությունների միջև՝ ԽՍՀՄ շրջանակներում:

Ըստ նրա՝ Ռուսաստանի, Ադրբեջանի և Հայաստանի ներկայացուցիչներից ստեղծվել է հատուկ եռակողմ խումբ, որն ամեն ինչ անում է տարածաշրջանում խաղաղությունը վերականգնելու համար: Այս աշխատանքի շահառուները, Պուտինի խոսքով, պետք է լինեն «Լեռնային Ղարաբաղի բնակիչները»։