«Ներկա-բացակայի» սպառնալիքներով ստիպում են գալ Փաշինյանի հանրահավաքին

Yerkir.am-ի տեղեկություններով՝ փաշինյանական խունտան, որն Արցախը վաճառելուց, 5000 հայորդու կյանք խլելուց ու ՀՀ-ի ապագան թուրք-ադրբեջանական տանդեմի ոտքերի տակ դնելուց հետո այսօր պատրաստվում է Հանրապետության հրապարակում հանրահավաքի և հրավառության, պետական օղակներում տեռոր է սկսել՝ հանձնարարելով բոլոր գերատեսչությունների ղեկավարներին, որպեսզի նրանք ցուցակներով մարդ ապահովեն երեկոյան հանրահավաքին:

Այսպես՝ քաղաքացիներից հստակ ահազանգեր կան, որ բոլոր նախարարությունների աշխատակիցներին հրահանգավորված է լինել Հրապարակի մերձակա և պայմանական նշան ունեցող այս կամ այն վայրերում, օրինակ՝ ժամացույցի տակ, Արամ Մանուկյանի, Գ. Նժդեհի արձանի մոտ և այլն, որպեսզի հստակ ներկա-բացակա անեն և ստուգեն բոլորի ներկայությունը:

Ահազանգեր են ստացվել նաև, որ բոլոր մարզերից մոտավորապես ժամը 17:00-18:00-ին, կախված մարզի հեռավորությունից, մարզպետարանների, հարկային, մաքսային ոլորտների և մարզային այլ հիմնարկների ներկայացուցիչներին հատուկ մեքենաներով բերելու են Երևան, որտեղ ևս նրանց ներկայությունը ստուգվելու է ստորագրության միջոցով:

Պարզորոշ է՝ հասարակության ստորին խավերին մոլորեցրած և սեփական վերարտադրությունն ապահովել փորձող հայրենադավ իշխանությունը լավագույնս գիտի, որ իրեն ընտրած «անգրագետ ու խաբված Պողոսները», որոնք հիմնականում մարզերում են, սոված են և միջոց անգամ չունեն հանրահավաքի գալու: Մյուս կողմից՝ և՛ դժվար է նրանց «բերման ենթարկելը», և՛ գեղեցիկ պատկեր չի ստեղծվի հրապարակում: Ուստիև, որպեսզի տպավորություն ստեղծվի, թե հայրենավաճառներին աջակցում են նաև հասարակության առաջադեմ խավի ներկայացուցիչները, որոշվել է վարչահրամայական միջնադարյան մեթոդների կիրառմամբ գոնե նրանց մի ինչ-որ հատվածի ներկայություն ապահովել հանրահավաքին: