Ադրբեջանի ԱԳՆ-ն հայտարարում է Հայաստանի հետ հարաբերությունները կարգավորելու ցանկության մասին

Ադրբեջանը Հայաստանի հետ հարաբերությունների կարգավորման կողմնակից է, Բաքուն այդ ուղղությամբ առաջարկ է արել Երևանին. ասել է Ադրբեջանի արտգործնախարար Ջեյհուն Բայրամովը:

«Մեր դիրքորոշումը հայտնի է այս հարցում, այն մնում է անփոփոխ: Այն բազմիցս արտահայտվել է մեր պետության ղեկավարի կողմից: Ադրբեջանը, հիմնվելով միջազգային իրավունքի նորմերի և սկզբունքների վրա, հարգելով տարածքային ամբողջականությունը, ինքնիշխանությունը և միջազգայնորեն ճանաչված սահմանների անձեռնմխելիությունը, հարաբերությունների կարգավորման կողմնակից է և այս ուղղությամբ առաջարկ է արվել», - երկուշաբթի ճեպազրույցում ասել է Բայրամովը:

Նրա խոսքով՝ Բաքուն կարծում է, որ տարածաշրջանում համագործակցությունն այլընտրանք չունի: