ՈւԵՖԱ-ն և ՌԴ ԱԳՆ-ն աշխատում են Եվրո-2020-ում մեկնաբան Առուստամյանին հավատարմագրելու ուղղությամբ

Եվրոպական ֆուտբոլային ասոցիացիաների միությունը (ՈՒԵՖԱ), Ռուսաստանի արտգործնախարարության հետ համատեղ, աշխատում են ապահովել, որ մեկնաբան Նոբել Առուստամյանը հավատարմագրվի՝  ֆուտբոլի Եվրոպայի առաջիկա առաջնությունը լուսաբանելու համար: Այս մասին չորեքշաբթի գրել է Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան իր Telegram ալիքում:

«ՈւԵՖԱ-ն լուծում է փնտրում, որը ռուսաստանցի սպորտային մեկնաբան Նոբել Առուստամյանին հնարավորություն կտա պրոֆեսիոնալ լուսաբանելու ֆուտբոլի Եվրոպայի առաջնությունը: Հավատում եմ, որ լուծում կգտնվի։ Ամբողջ երեկո աշխատել ենք այդ ուղղությամբ։ Եվ կարող եմ ասել, որ վաղուց չէինք տեսել բոլոր ներգրավված կողմերի նման կառուցողական մոտեցում»,- գրել է նա։

Դիվանագետը շեշտել է, որ Ռուսաստանը միջոցառումների մի ամբողջ շարք է իրականացնում`այս ժամանակահատվածում օտարերկրյա թղթակիցների աշխատանքը հնարավորինս հարմարավետ դարձնելու համար:

Ավելի վաղ Match TV-ի գլխավոր պրոդյուսեր Թինա Կանդելակին իր Telegram ալիքում ասել էր, որ մարզային ֆուտբոլի ֆեդերացիաներից մեկը (Ադրբեջանը) հրաժարվել է հաստատել մեկնաբան Առուստամյանին:

Ադրբեջանն էլ հայտնել էր, որ հայ մեկնաբանին հավատարմագիր չտալը կապված է նրա՝ Արցախ կատարած այցելության հետ։