Իսրայելը պատրաստվում է ՀԱՄԱՍ-ի հետ նոր պատերազմի. Jerusalem Post

Չնայած Իսրայելի ու ՀԱՄԱՍ-ի միջև վերջերս հաստատված հրադադարին՝ Իսրայելի ՊՆ ռազմական հետախուզության գրասենյակն արդեն պատրաստվում է բռնության նոր փուլի.  գրում է Jerusalem Post-ը:

Հետախուզական ստորաբաժանման կարծիքով՝ ՀԱՄԱՍ-ը դեռ լիովին տեղյակ չէ «Պատի պահապան» գործողության ընթացքում իրեն հասցված վնասի մասին: Չորեքշաբթի ՀԱՄԱՍ-ի առաջնորդը թերագնահատել էր 11-օրյա գործողության ընթացքում ռազմական ենթակառուցվածքներին հասցված վնասը: Նա սպառնացել էր վերսկսել ռազմական գործողությունները, եթե Իսրայելը «մեծ խելագարություն գործի Երուսաղեմում և սրբավայրերում»:

Իսրայելի ՊՆ-ն ասում է, որ հարյուրավոր թիրախներ կան, որոնց պատրաստ է խոցել և շարունակում է ավելացնել դրանք:

Իսրայելական հետախուզության գնահատականների համաձայն՝ ՀԱՄԱՍ-ի, այսպես կոչված, «ռազմական» թևի՝ «Իզզադին ալ Ղասամ»-ի հրամանատար Մուհամմադ Դեյֆը ցանկանում էր մի քանի գրոհներ ձեռնարկել Իսրայելի վրա, ներառյալ՝ զորքերի կամ խաղաղ բնակիչների դեմ սահմանային հարձակումը, ինչպես նաև մեծաքանակ հրթիռային հարձակումներ գործել՝ ոչնչացնելով «Երկաթե գմբեթ» ՀՕՊ համակարգը:

Թեև Իսրայելը հասկանում է, որ չի հաջողվել ոչնչացնել շրջափակված Գազայի հատվածում հրթիռային զինանոցները, այնուամենայնիվ, կարծում է, որ հաջողվել է հետ պահել առաջիկայում ՀԱՄԱՍ-ին  Իսրայելի հետ նոր պատերազմից: