Նեթանյահուն շնորհակալություն է հայտնել Եգիպտոսին՝ հրադադարի հաստատմանն աջակցելու համար

Իսրայելի վարչապետ Բինյամին Նեթանյահուն երախտագիտություն է հայտնել Եգիպտոսի նախագահ Աբդել Ֆաթահ ալ Սիսիին Իսրայելի և պաղեստինյան ՀԱՄԱՍ շարժման միջև, որը վերահսկում է Գազայի հատվածը, զինադադար կնքելու ջանքերի համար: Այս մասին ասվում է Twitter-ում Իսրայելի վարչապետի մամուլի քարտուղար Օֆիր Գենդելմանի`  արաբերենով հաղորդագրության մեջ։

«Շնորհակալություն, պարո'ն նախագահ ալ Սիսի, մեր տարածաշրջանում խաղաղության վերականգնման, ինչպես նաև անվտանգության և կայունության ամրապնդման գործում նշանակալի դերի համար»,- նշված է հաղորդագրության մեջ:

Հիշեցնենք, որ մայիսի 20-ի երեկոյան Իսրայելի կառավարությանն առընթեր ռազմական կաբինետը միաձայն կողմ քվեարկեց Գազայի հատվածում հրադադարի ռեժիմի պահպանմանը: Զինադադարը սկսվեց մայիսի 21-ին` տեղական ժամանակով 02:00-ին: Կողմերը դադարեցրին գնդակոծությունները: Սակայն մայիսի 21-ի առավոտյան Երուսաղեմում Տաճարի լեռան վրա դարձյալ բախումներ սկսվեցին իսրայելական ոստիկանության և պաղեստինցիների միջև: