ԱՄՆ-ը Ռուսաստանին մեղադրում է Արկտիկայում «անօրինական ծովային պահանջների» մեջ

ԱՄՆ պետքարտուղար Էնթոնի Բլինքենը քննադատել է Ռուսաստանի գործողությունները Արկտիկայի տարածաշրջանում՝ դրանք անվանելով «անօրինական ծովային պահանջներ», և կոչ է արել Մոսկվային՝ խուսափել Արկտիկայի ռազմականացումից:

Ըստ Reuters-ի՝ Բլինքենն ասել է, որ պետությունները վրդովված են Հյուսիսային ծովային երթուղիով օտարերկրյա ռազմանավերի անցման վերաբերյալ Ռուսաստանի ներկայացրած պահանջներից, ըստ որոնց՝ պետությունները պետք է նախօրոք տեղեկացնեն Մոսկվային Արկտիկայի ռուսական հատվածով անցնելու մասին: Նրանք, ովքեր կփորձեն դա անել առանց պաշտոնական թույլտվության, կարող են բախվել նավի առգրավմանը կամ նույնիսկ ոչնչացմանը:

«Մենք տեսանք, թե ինչպես է Ռուսաստանը առաջ քաշում ապօրինի ծովային պահանջներ... Դա անհամատեղելի է միջազգային իրավունքի հետ: Ռուսաստանի կողմից առաջարկվող կարգավորիչ սխեման համարժեքորեն հաշվի չի առնում տարածքային ջրերում և բացառիկ տնտեսական գոտում նավարկության իրավունքներն ու ազատությունը»,- ասել է Բլինքենը՝ ավելացնելով, որ Վաշինգտոնը մտահոգված է, որ ռազմականացման ավելացումը կարող է լուրջ խնդիրների հանգեցնել: