ՏԵՍԱՆՅՈՒԹ․ Օրը 3 կմ եթե ադրբեջանցիները գան, 38 օր է ձեզ մնացել, մինչև ընտրությունները Երևան են հասնելու․ լրագրողը՝ մարզպետին

Արդյո՞ք գերիների վերադարձի հարց չի քննարկվում Սյունիքի տարածքների դիմաց՝ ըստ Yerkir.am-ի լրագրողների այս հարցին կառավարությունից դուրս եկող՝ Լոռու մարզպետ Արամ Խաչատրյանը պատասխանեց, որ իրեն նման բան հայտնի չէ։

Որպես հանրային իշխանության ներկայացուցիչ, ի՞նչ է նրան հայտնի երկրի անվտանգության մասին՝ հարցին մարզպետը պատասխանեց, որ վարչապետի խոսքը իրեն բավարարում է։

Այն, ինչ այսօր կատարվում է սահմանին, դա ՀՀ կառավարության քաղաքականության հետևանքն է, ինչո՞ւ Իշխանասարում, որտեղից մեր երկրի ջրային ռեսուրսներն են վերահսկվում, 6 ամիս պաշտպանություն չի իրականացվել․ մարզպետ, որը նախկինում սպա է եղել, ասաց, որ ինքը շատ լավ գիտի՝ բարձունքը ինչ է, և, իր կարծիքով, վարչապետը ամեն ինչ անում է, որ մեր անվտանգությունը պաշտպանվի։

Մարզպետի պնդմանը, որ Հայաստանի 70-80 տոկոսը իրենց թիմին վստահում է, լրագրողը հակադարձեց՝ ի՞նչ հարց եք դուք կարողանում լուծել, եթե անգամ տարհանվածների հարցը ձեր փոխարեն լուծում է ռուսը։

Լոռու մարզպետն առաջարկեց դա իմանալու համար բացել Լոռու մարզպետարանի կայքէջը։

Մենք որքանո՞վ կարող ենք հանգիստ լինել Սյունիքում կատարվողից՝ հարցին մարզպետը պատասխանեց, որ ամբողջական կարող ենք հանգիստ լինել, որովհետև վարչապետն է այդ մասին խոսել։

«Կարող են այսօր սահմանին ինչ-որ փոփոխություններ լինել, 90-ականներին էլ է եղել, բայց ամեն ինչ վերահսկողության տակ է, անհանգստանալու ոչինչ չկա, մեր զինված ուժերը կատարում են իրենց խնդիրները»,-ասաց մարզպետը։

Այդ դեպքում ինչպե՞ս են ադրբեջանցիները տարբեր հատվածներում 3 կմ առաջ եկել՝ հակադարձեց լրագրողը։

«Ես աշխարհագրորեն տեղանքին ծանոթ չեմ, բայց վստահում եմ Անդրանիկ Քոչարյանի ասածին, որ Իշխանասարը ընդամենը սար է՝ չպահպանվող դիրքով, այդպիսի սարեր և դիրքեր էլի կան»,-ասաց մարզպետը։ Լրագրողը հակադարձեց՝ ուրեմն, այդ դեպքում, նա պետք է վախենար, որովհետև Քոչարյանն ասել է՝ այդպիսի չպահպանվող սարեր էլի կան։

«Օրը 3 կմ եթե ադրբեջանցիները առաջ գան, 38 օր է ձեզ մնացել, մինչև ընտրությունները Երևան են հասնելու»,-նկատեց լրագրողը։։

Մարզպետ Արամ Խաչատրյանը կորցրեց ինքնատիրապետումը և վիրավորեց լրագրողին․ «Դու արդեն չափդ անցնում ես»։

Մանրամասն՝ տեսանյութում․