Մենք մերժում ենք և չենք ճանաչում Լատվիայի խորհրդարանի որոշումը ցեղասպանության վերաբերյալ. Հուլուսի Աքար

Թուրքիայի ազգային պաշտպանության նախարար Հուլուսի Աքարը հանդիպել է Լատվիայի փոխվարչապետ և պաշտպանության նախարար Արթիս Պաբրիկսի հետ․ ըստ «Անադոլու» գործակալության՝ ասվում է Թուրքիայի ՊՆ հաղորդագրության մեջ:

Տեսակոնֆերանսի միջոցով կայացած հանդիպման ընթացքում կողմերը մտքեր են փոխանակել երկկողմ և տարածաշրջանային պաշտպանության, անվտանգության, պաշտպանական արդյունաբերության և ՆԱՏՕ-ում համագործակցության հարցերի շուրջ:

Բացի այդ՝ մեկ այլ հաղորդագրության մեջ Թուրքիայի ազգային պաշտպանության նախարարությունը դատապարտել է Լատվիայի խորհրդարանի որոշումը 1915 թվականի իրադարձությունները որպես ցեղասպանություն որակելու վերաբերյալ:

«Մենք մերժում ենք և չենք ճանաչում Լատվիայի խորհրդարանի որոշումը, այսպես կոչված, ցեղասպանության վերաբերյալ»,- ասվում է պաշտպանության նախարարության թվիթերյան հաղորդագրության մեջ: