Ցեղասպանության համընդհանուր ճանաչումը տարածաշրջանում հայ ժողովրդի անվտանգության կարեւորագույն գրավականներից է.ԱԳՆ

Հայաստանի Արտաքին գործերի նախարարությունը ողջունել է Լատվիայի խորհրդարանի կողմից Հայոց ցեղասպանությունը ճանաչող հռչակագրի ընդունումը: Այս մասին հայտարարություն է տարածել ԱԳՆ–ն։

«Սա եւս մեկ քայլ է Հայոց ցեղասպանության համընդհանուր ճանաչման եւ դատապարտման ուղղությամբ:

Այս հռչակագիրը կարեւոր է ոչ միայն պատմական արդարության եւ ճշմարտության, այլեւ ապագայում նման հանցագործությունների կանխարգելման տեսակետից: Հայոց ցեղասպանության համընդհանուր ճանաչումը տարածաշրջանում հայ ժողովրդի անվտանգության կարեւորագույն գրավականներից է:

Կիսում ենք Լատվիայի խորհրդարանի դիրքորոշումն առ այն, որ նման հանցագործությունների ճանաչումը կոչված է կառուցելու այնպիսի ապագա, որտեղ հարգվում են մարդու իրավունքները, եւ յուրաքանչյուր անհատ կարող է լինել ազատ, անվտանգ եւ ապահով»,– ասվում է հայտարարության մեջ։