Զելենսկին նշել է, թե որն է Պուտինի հետ հանդիպելու իդեալական վայրը

Ուկրաինայի նախագահ Վլադիմիր Զելենսկին իտալական La Repubblica թերթին տված հարցազրույցում ասել է, որ Վատիկանը կարող է դառնալ «օպտիմալ վայրը» Ռուսաստանի հետ Դոնբասի շուրջ բանակցությունների համար:

«Սուրբ Աթոռը համաշխարհային բարոյական հեղինակություն է, որը միշտ արդյունավետորեն հանդես է գալիս որպես միջնորդ՝ լինելով անկողմնակալ և վստահելի հակամարտության բոլոր կողմերի համար: Այդ իսկ պատճառով Վատիկանը պատմության մեջ հաճախ է կանչվել՝ լուծելու հակամարտությունները պետությունների միջև՝ խաղաղ ապագայի համար»,– ասել է նա։

Անցյալ շաբաթ Ուկրաինայի ղեկավարը տեսաուղերձով իր ռուս գործընկերոջը հրավիրել էր «հանդիպել ուկրաինական Դոնբասի ցանկացած վայրում, որտեղ պատերազմ է ընթանում»: Վլադիմիր Պուտինը պատասխանել էր, որ Կիևը, առաջին հերթին, պետք է երկխոսություն վարի Դոնեցկի և Լուգանսկի ղեկավարության հետ, բայց ավելացրել էր, որ պատրաստ է Զելենսկիին ընդունել Մոսկվայում, եթե ցանկանա քննարկել երկկողմ օրակարգը: Առանձնահատուկ շեշտվել էր, որ այն չի ներառում ո՛չ Ղրիմը, ո՛չ էլ Դոնբասը: