Ադրբեջանը դատի կտա Հայաստանին միջազգային դատարաններում. Իլհամ Ալիև

Ադրբեջանը նախատեսում է հայց ներկայացնել Հայաստանի դեմ միջազգային դատարաններում՝ երկրի տարածքին հասցված վնասի համար, մինչ դրանք գտնվում էին հայկական զինված ուժերի օկուպացիայի տակ․ հայտարարել է Ադրբեջանի նախագահ Իլհամ Ալիևը պետական հեռուստատեսությանը տված հարցազրույցում:

«Ներկա փուլում այնտեղ աշխատանքներ են տարվում տարբեր ուղղություններով, ականազերծման գործընթաց է տարվում: Դրան զուգահեռ՝ մեկնարկել են հիմնական ենթակառուցվածքային նախագծերը: Աշխատանքներ են տարվում ճանապարհային ենթակառուցվածքների ստեղծման հետ կապված բոլոր ոլորտներում: Առաջին հերթին կառուցվում են Ֆիզուլի-Շուշի ճանապարհը, «Հաղթանակի ճանապարհը», մեր մայրուղին, իսկ առաջիկայում դրվելու է Հորադիզ-Զանգելան մայրուղու հիմքը: Ֆիզուլի-Հադրութ, Ֆիզուլի-Ջաբրայիլ, Բարդա-Աղդամ, Գոյգոլ-Տողանալի-Քելբաջար ճանապարհների շինարարությունն արդեն սկսվել է: Դրան զուգահեռ՝ ստեղծվում են Բարդա-Աղդամ և Հորադիզ-Զանգիլան-Աղբենդ երկաթուղային ենթակառուցվածքները: Այս ճանապարհը կհասնի Զանգեզուրի միջանցք, աշխատանքներն արդեն ընթանում են՝ ըստ ժամանակացույցի:

Դրան զուգահեռ՝ շարունակվում է հասցված վնասի հաշվարկման գործընթացը, ներգրավվել են օտարերկրյա մասնագետներ: Ինչպես գիտեք, մեր ծրագրերը միջազգային դատարաններում Հայաստանին հայց ներկայացնելն է: Բնականաբար, մենք դա կանենք, և օտարերկրյա փորձագետները մեզ կօգնեն այս հարցում: Հայաստանը և նրա օտարերկրյա գործընկերները, անօրինականորեն շահագործելով մեր բնական ռեսուրսները, կկանգնեն միջազգային դատարանի առջև, քանի որ հայերի կողմից ոսկու, պղնձի և այլ բնական պաշարների հանքավայրերի թալանը, դրանց ապօրինի շահագործումը համարվում է միջազգային հանցագործություն, և այս ուղղությամբ նաև իրավական ընթացակարգեր են գործարկվել: Օտարերկրյա գործընկերներն արդեն ներգրավվել են այս գործում»,- ասել է Ալիևը: