Իրանը դիվերսիաներից հետո 50%-ով կմեծացնի Նաթանզում միջուկային օբյեկտի արտադրական հզորությունը

Նաթանզի միջուկային օբյեկտում կատարված դիվերսիան չի հանգեցրել ուրանի հարստացման գործընթացի դադարեցմանը, որի արտադրական հզորությունը նախատեսվում է ավելացնել 50%-ով: Այդ մասին երկուշաբթի հայտարարել է Իրանի փոխնախագահ, Իրանի ատոմային էներգիայի կազմակերպության ղեկավար Ալի Աքբար Սալեհին:

«Շահիդ Ահմադի Ռոշանի հարստացման օբյեկտում երեկ տեղի ունեցած միջադեպը խոչընդոտ չդարձավ հարստացման համար. վթարային էլեկտրամատակարարումը միացվել է համալիրին»,- նրա խոսքերն է մեջբերում IRIB հեռուստաընկերությունը:

Իրանի փոխնախագահի խոսքով՝ «հնարավորինս սեղմ ժամկետում Նաթանզում գտնվող հաստատությունը կշարունակի աշխատել արտադրողականության 50% աճով»:

Նա հավելել է, որ «մի քանի օրվա ընթացքում իշխանությունները վնասված ցենտրիֆուգները կփոխարինեն ավելի մեծ հզորությամբ ցենտրիֆուգներով»:

Հիշեցնենք, որ երեկ նշված օբյեկտում պայթյուն է տեղի ունեցել. Իրանը և New York Times–ի՝ Սպիտակ տան աղբյուրները դրա մեղավոր են համարում Իսրայելին, որը չի մեկնաբանել կատարվածը։