ՆԱՏՕ-ն մտահոգություն է հայտնել վրացական ընդդիմության առաջնորդի ձերբակալության կապակցությամբ

Անհանգստացած ենք Վրաստանում տեղի ունեցած վերջին իրադարձություններից, ներառյալ՝ ամենաազդեցիկ ընդդիմադիր կուսակցության առաջնորդի ձերբակալությունից, և  ցանկանում ենք, որ այս վեճը լուծվի խաղաղ ճանապարհով․ ասել է ՆԱՏՕ-ի գլխավոր քարտուղար Իենս Ստոլտենբերգը  Վրաստանի վարչապետի հետ համատեղ մամուլի ասուլիսում։

Միևնույն ժամանակ, պատասխանելով լրագրողի այն հարցին, թե ինչո՞ւ է Վրաստանում քաղաքական կայունությունը ՆԱՏՕ-ի համար կարևոր, և արդյո՞ք ներկայիս ճգնաժամը կազդի երկրի եվրաատլանտյան ինտեգրման վրա, Ստոլտենբերգը նշել է, որ ՆԱՏՕ-ն դաշինք է, որը հիմնված է այնպիսի արժեքների վրա, ինչպիսիք են օրենքի գերակայությունը և ժողովրդավարություն:

«ՆԱՏՕ-ն դաշինք է, որը կանգնած է հիմնական արժեքների վրա, ինչպիսիք են օրենքի գերակայությունը, ժողովրդավարությունը, անհատական ազատությունները, և դա, անկասկած, կարևոր է Հյուսիսատլանտյան դաշինքի բոլոր անդամների համար: Հետևաբար, մենք ողջունում ենք այն առաջընթացը, որը Վրաստանը գրանցել է ամրապնդման գործում: ՆԱՏՕ-ի անդամները նույնպես սատարում էին երկրի այս ջանքերը: Մեզ անհանգստացնում են Վրաստանում վերջերս տեղի ունեցող իրադարձությունները, ներառյալ՝ ամենաազդեցիկ ընդդիմադիր կուսակցության առաջնորդի ձերբակալությունը, և ցանկանում ենք, որ այս վեճը լուծվի խաղաղ ճանապարհով, իսկ Վրաստանը շարունակի բարեփոխումներ իրականացնել և զարգացնել երկրում ժողովրդավարությունը։ Մենք աջակցում ենք ԵՄ-ի՝  բանակցային գործընթացին միջնորդելու ջանքերին»,- ասել է Ստոլտենբերգը: