Ելիսեյան պալատում հայտարարել են, որ Մակրոնի մոտ անցել են կորոնավիրուսով վարակման ախտանիշները

Ելիսեյան պալատում հայտարարել են, որ Ֆրանսիայի նախագահ Էմանուել Մակրոնի մոտ անցել են կորոնավիրուսով վարակման ախտանիշները, հաղորդում է ՏԱՍՍ-ը:

«Հանրապետության նախագահի մոտ այլեւս չեն նկատվում կորոնավիրուսով վարակման ախտանիշներ: Հիվանդության ժամանակ Մակրոնը շարունակել Է աշխատել եւ անհրաժեշտ խորհրդատվություններ անցկացնել: Այդպիսով, նա կշարունակի կատարել իր գործառույթները առաջիկա ժամերին եւ օրերին»,-հայտնել են Ելիսեյան պալատում:

Ավելի վաղ հաղորդվել է, որ Մակրոնը հանդիպումներ է անցկացնում տեսահամաժողովների ձեւաչափով:

«Գործող սանիտարական կանոնակարգի համաձայն՝ նախագահի մեկուսացումը կարող է դադարեցվել ինքնամեկուսացման 7 օրվա ավարտից հետո: Սուրբ Ծննդից ժամեր առաջ Մակրոնը կցանկանար հիշեցնել բարիերային միջոցների, սենյակների օդափոխման, դմակներ կրելու, ձեռքերը կանոնավոր կերպով լվանալու եւ ամենօրյա շփումների քանակը սահմանափակելու կարեւորության մասին»,-նշվում է հայտարարության մեջ:      

Մակրոնը ֆրանսիացիներին լավ տոներ է մաղթել եւ վստահություն հայտնել, որ կարող է ապավինել յուրաքանչյուրին կորոնավիրուսի տարածմանը դիմակայելու հարցում:

Դեկտեմբերի 17-ին Ելիսեյան պալատը հայտնել է, որ Ֆրանսիայի նախագահ Էմանուել Մակրոնը կորոնավիրուսի թեստ է հանձնել, որի պատասխանը դրական է եղել: Ելիսեյան պալատի մամուլի ծառայության հաղորդմամբ՝ Նա կշարունակի հեռավար աշխատել եւ իրականացնել իր գործունեությունը: Նա ինքնամեկուսացել է Լանտերն նստավայրում, որը գտնվում է Վերսալի պալատական համալիրի տարածքում: