Գերմանիայի ԱԳՆ–ն դեմ է արտահայտվել Թուրքիայի նկատմամբ զենքի էմբարգո սահմանելու պահանջին

Գերմանիայի արտաքին գործերի նախարար Հայկո Մաասը երկուշաբթի դեմ է արտահայտվել Հունաստանի պահանջին՝ զենքի էմբարգո կիրառել Թուրքիայի նկատմամբ՝ Արևելյան Միջերկրական ծովում շարունակվող լարվածության ֆոնին:

«Ես ռազմավարական առումով ճիշտ չեմ համարում Թուրքիայի դեմ զենքի էմբարգո կիրառելու պահանջը: Դա հեշտ չէ անել ՆԱՏՕ-ի գործընկերոջ դեմ: Մենք տեսանք, որ ՆԱՏՕ-ի դաշնակից Թուրքիան հեշտությամբ հրթիռներ է գնել Ռուսաստանից, քանի որ չէր կարող դրանք գնել ԱՄՆ-ից»,- ասել է Մաասը Deutsche Presse-Agentur-ին տված հարցազրույցում:

Գերմանացի նախարարը նաև հույս է հայտնել, որ Արևելյան Միջերկրական ծովում վեճերը կլուծվեն դիվանագիտական ուղիներով:

«Իհարկե, մենք դեռ հավատում ենք, որ հակամարտությունը լուծում ունի, և որ մեզ հարկավոր չէ ընդմիշտ հեռացնել ՆԱՏՕ-ի մեր գործընկերոջը զենքի ոլորտում համագործակցությունից», - շեշտել է նա: