Սա «հայկական ամոթ» է, երբ ուրիշի արածի պատճառով ուզում ես ամոթից մեռնել. Նիկոլայ Պետրոսյան

Mail.ru–ի Cybersport Media-ի տնօրեն Նիկոլայ Պետրոսյանը իր «Армянский прагматик» թելեգրամյան էջում նշել է, որ, հայտնի «իսպանական ամոթ» արտահայտությանը զուգահեռ, պետք է շրջանառության մեջ դնել նաև «հայկական ամոթ» արտահայտությունը։

««Իսպանական ամոթ» արտահայտությունը վերաբերում է մեկ այլ անձի գործողությունների պատճառով ամաչելուն: Ուղղակի անհարմար զգալուն, հասկանո՞ւմ եք:

Այսօրվանից շրջանառության մեջ կարող է դրվել «հայկական ամոթ» արտահայտությունը, որը կնշանակի մեկ այլ անձի գործողությունների համար ամոթից մեռնելու ցանկություն: Ոչ միայն անհարմարություն, այլ հողի մեջ մտնելու ցանկություն՝ միայն թե դա չտեսնելու համար:

Ոչ մի այլ զգացում, բացի «հայկական ամոթից», չի առաջանում, երբ տեսնում ես, թե ինչպես են զոհված զինվորների մայրերը, կանգնած իրենց որդիների թարմ գերեզմանների մոտ, ասում. «Շնորհակալություն, պարո՛ն Փաշինյան»:

Եվ սիրված վարչապետը գլխով է անում, ընդունում շնորհակալությունը և, հայկական ավանդույթին հակառակ, մեկ մեխակ է դնում իր անփույթ քաղաքականության պատճառով զոհված երիտասարդ տղաների գերեզմաններին: Հայկական ամոթ ...»,– գրել է Պետրոսյանը։

Հիշեցնենք, որ օրերս տեղեկություններ է տարածվել առ այն, որ Եռաբլուրում Նիկոլ Փաշինյանին շնորհակալություն հայտնածները Փաշինյանի աջակիցներից էին և զոհված զինվոր չունեն։