Ադրբեջանի ԱԳՆ-ն որպես սադրանք է որակել Արցախի վերաբերյալ Ֆրանսիայի Սենատի բանաձևը

Ֆրանսիայի Սենատի բանաձևը, որը երկրի կառավարությանը կոչ է անում ճանաչել Լեռնային Ղարաբաղի անկախությունը, կարող է գնահատվել որպես սադրանք. հինգշաբթի հաղորդել է Ադրբեջանի ԱԳՆ մամուլի ծառայությունը՝ մեկնաբանելով ֆրանսիացի խորհրդարանականների կայացրած որոշումը:

«Սենատի կողմից բացարձակ կողմնակալ բանաձևի ընդունումը կարող է դիտվել որպես սադրանք: Ըստ ամենայնի՝ ֆրանսահայերը լայնորեն օգտագործում են հակամարտության թեման ընտրական նպատակներով», - նշել են Ադրբեջանի ԱԳՆ մամուլի ծառայությունից:

Արտաքին գործերի նախարարությունը շեշտել է, որ բանաձեւը իրավական ուժ չունի: «Բայց հաշվի առնելով այս փաստաթղթի քաղաքական նշանակությունը, դրա ընդունումը Ֆրանսիայում, որն ունի միջնորդական մանդատ, լուրջ կասկածներ է հարուցում այս երկրի չեզոքության վերաբերյալ»,- ասվում է հայտարարության մեջ:

Ադրբեջանի արտաքին գործերի նախարարությունը Ֆրանսիայի Սենատին խորհուրդ է տվել «կողմնակալ որոշումներ ընդունելու փոխարեն տարածաշրջանում խաղաղություն, կայունություն և առաջընթաց ապահովող գործողություններ իրականացնել»: