Ֆրանսիան Թուրքիայից պահանջում է հարգել Ղարաբաղում հրադադարի ռեժիմը

Ըստ Reuters-ի՝ Ֆրանսիայի արտաքին գործերի նախարար Ժան-Իվ Լե Դրիանը դատապարտել է Թուրքիայի դերը Լեռնային Ղարաբաղի ռազմական հակամարտությունում: Նախարարի խոսքով՝ Թուրքիան աջակցում է Ադրբեջանին տեղի հայերի դեմ պայքարում:

«Այս հակամարտությունում ռազմական հաղթանակ չի լինի, հրադադարը պետք է հարգվի, բայց Թուրքիան միակ երկիրն է, որը չի ցանկանում հարգել հրադադարը, և դա մեծ վնաս է հասցնում»,- ասել է Լե Դրիանը:

Այս մասին Ֆրանսիայի արտգործնախարարը հայտարարել է իր գերմանացի և լեհ գործընկերների՝ Հայկո Մաասի և Զբիգնև Ռաուի հետ Փարիզում կայացած համատեղ հանդիպումից հետո:

Հանդիպման օրակարգում են եղել Ռուսաստանի հետ հարաբերությունները, Բելառուսում տիրող իրավիճակը և Լեռնային Ղարաբաղում ռազմական հակամարտությունը: Ֆրանսիայի, Գերմանիայի և Լեհաստանի միջև քննարկումների այս ձևաչափը հայտնի է որպես «Վեյմարի եռյակ»:

Ֆրանսիան և Գերմանիան այս հանդիպման ընթացքում դատապարտել են նաև Թուրքիային Միջերկրական ծովում Եվրամիության դեմ սադրանքի համար:

Եվրամիությունը Անկարայից պահանջել է դադարեցնել Միջերկրական ծովի վիճահարույց տարածքներում բնական գազի որոնումն ու արդյունահանումը։