Ռուսաստանը հերքել է Ալիևի խոսքերը Արցախում թուրք խաղաղապահների մասին

Մոսկվան հերքել է Ադրբեջանի նախագահ Իլհամ Ալիևի խոսքերը Լեռնային Ղարաբաղում Ռուսաստանի հետ թուրք խաղաղապահների տեղակայման վերաբերյալ. հայտարարել է ՌԴ արտաքին գործերի նախարարության մամուլի խոսնակ Մարիա Զախարովան՝ «Էխո Մոսկվի» ռադիոկայանի եթերում:

«Կարևոր պահը, որին ցանկանում եմ ձեր ուշադրությունը հրավիրել, վերաբերում է խաղաղապահ ուժերին: Մենք խոսում ենք Ռուսաստանի Դաշնության խաղաղապահ ուժերի մասին»,- շեշտել է Զախարովան:

Նա շեշտել է, որ խոսքը վերաբերում է Լեռնային Ղարաբաղի շփման գծի երկայնքով գտնվող զորակայանին: Նշվում է նաև, որ այս տարածաշրջանի կարգավիճակի հարցը շարադրված է Ռուսաստանի, Հայաստանի և Ադրբեջանի համատեղ հայտարարության մեջ:

Ավելի վաղ Ադրբեջանում դիվանագիտական աղբյուրը նշել էր Ռուսաստանի և Թուրքիայի միջև Արցախում իրավիճակի մոնիթորինգի վերաբերյալ համաձայնագրի հնարավոր ստորագրման օրը: Նշվում էր, որ Ռուսաստանի և Թուրքիայի պաշտպանության նախարարությունները նոյեմբերի 10-ին Լեռնային Ղարաբաղում հրադադարի ռեժիմը պահպանելու համար դիտարկման համատեղ կենտրոն ստեղծելու մասին հատուկ համաձայնագիր կստորագրեն: Այս տեղեկատվությունը դեռ պաշտոնապես չի հաստատվել ո՛չ ռուսական, ո՛չ էլ թուրքական կողմից:

Ադրբեջանի նախագահ Իլհամ Ալիևը հայտնել է, որ ռուս խաղաղապահների հետ թուրքական զորամիավորում է բերվելու տարածաշրջան: Այնուամենայնիվ, պայմանագրում նշվում է միայն Ռուսաստանի խաղաղապահ ուժերի մասին: